Në vazhdimësi të zbatimit të Kalendarit të Dëgjesave Publike, në kuadër të përgatitjes dhe hartimit të programit buxhetor afat mesëm 2025-2027, zhvilluam Dëgjesën Publike në Njësitë Administrative Nr.1, 2 dhe 3 për tre programet më kryesore të buxhetit të Bashkisë Durrës.
- Programi i Infrastrukturës Rrugore dhe Investimet Publike për PBA 2025-2027
- Programi i Arsimit Parashkollor dhe Parauniversitar
- Programi i Strehimit dhe Shërbimit Social
Në këtë takim kishte një pjesëmarrje të gjerë, ku të pranishëm ishin përfaqësues të komunitetit të Njësive Administrative, përfaqësues të grupeve të interesit, qytetarë, përfaqësues të Këshillit Bashkiak, Institucioneve Arsimore, OJF që operojne në këto njësi etj.
Takimin e hapi Nënkryetari i Bashkisë, Elio Jani i cili bëri një panoramë të investimeve që janë bërë në këto njësi.
Më tej dëgjesa vazhdoi me prezantimin e tre programeve buxhetore për PBA 2025-2027, të cilët u prezantuan nga Drejtorët e Drejtorive përkatëse të Bashkisë Durrës.
Më pas u prezantuan objektivat për investimet në infrastrukturë rrugore në Projekt Buxhetin e vitit 2025-2027, ndërtimin e 6 rrugëve në Njësinë Administrative Nr.1, ndërtimin e 6 rrugëve në Njësinë Administrative Nr.2 dhe 2 rrugëve në Njësinë Administrative Nr.3, ndërtimin e unazës Durrës, Rruga “Pjetër Bogdani” dhe Rruga “Isuf Ferra”, Rikonstruksion i rrugës “Adria”, “Aleksandër Goga” dhe “Kasem Durrësi”. Projektet në infrastrukturën publike për vitin 2025-2027 përfshijnë rikonstruksionin dhe ndërtimin e qendrave shëndetësore, rikonstruksion dhe ndërtimin e kopshteve dhe çerdheve, krijimin e hapësirave publike si dhe kënde lojërash për fëmijë brenda blloqeve të banimit, ndërtimin e terreneve sportive, ndriçim i rrugëve të qytetit, rehabilitim i shëtitores “Taulantia”, rikonstruksion i Mauzoleumit të Dëshmorëve.
Pas prezantimit të këtyre programeve, fjalën e morën banorët dhe të pranishmit në sallë, të cilët diskutuan rreth këtyre prioriteteve, duke dhënë mendimet dhe duke parashtruar kërkesat dhe sugjerimet e tyre.
October 16, 2024