Kryebashkiakja Emiriana Sako merr pjesë në ceremoninë solemne në përkujtim të 113 vjetorit të ditës së flamurit në Durrës
Bashkia e Durrësit ka organizuar një ceremoni solemne në përkujtim të ngritjes së flamurit të pavarësisë në Durrës në 26 nëntor 1912. Në këtë ceremoni kanë marrë pjesë kryetarja e Bashkisë së Durrësit Emiriana Sako, prefekti Emiljan Jani, kryetari i qarkut Alfred Mullaraj, deputetë, përfaqësues të komuniteteve fetare dhe përfaqësues të organizatës së veteranëve. Pas tingujve të himnit kombëtar, flamurin pranë Bashkisë e ka ngritur kryetarja e Bashkisë së Durrësit Emiriana Sako. Kryebashkiakja Sako deklaroi se të gjithë përulen me respekt përpara të gjithë atyre patriotëve që sakrifikuan gjithçka për pavarësinë e vendit: “Të nderuar të pranishëm, ju falënderoj nga zemra që jeni sot këtu, për të përkujtuar një nga ngjarjet më madhore të historisë së Durrësit, kur përfaqësuesit e këtij qyteti vendosën të ngrejnë flamurin kombëtar dhe të shpallin shkëputjen nga Perandoria Osmane. Kjo ditë shënon një prej momenteve më të rëndësishme të identitetit tonë qytetar dhe mbetet një gur themeli në historinë e Durrësit të shekullit XX e më tej.
Para 113 vitesh, kryetari i parë i Bashkisë së Durrësit, Hafiz Ali Podgorica, ngriti flamurin shqiptar më 26 nëntor 1912. Ky akt solemn përfaqëson kujtesën e vlerave më të çmuara kombëtare dhe sakrificat e panumërta që janë bërë për këtë vend. Një akt që ne e nderojmë përherë me krenari. Durrësi është qyteti që priti Ismail Qemalin dhe atdhetarët që e shoqëronin, në udhëtimin e tyre historik drejt përmbushjes së misionit të shenjtë: shpalljen e Pavarësisë së Shqipërisë.
Me ngritjen e flamurit në Durrës, nisi rrugëtimi i shtetit të pavarur shqiptar. Sot, me mirënjohje e nderim, kujtojmë figurat e shquara durrsake që kontribuan me përkushtim atdhetar: kryetarin e parë të bashkisë Hafiz Ali Podgorica, ata që siguruan udhëtimin e Ismail Qemalit të kryesuar nga Kasem Durrësi, përfaqësuesit e Durrësit në Kuvendin e Vlorës: Dom Nikollë Kaçorri, Jahja Ballhysa, Mustafa Basha, Abaz ÇelKupa, si dhe patriotët Agostin Sereqi, Sotir Veveçka, Sulejman Kadiu, Stefan dhe Marie Kaçulini, e shumë të tjerë që lanë gjurmë të pashlyeshme në këtë moment historik.
Ngritja e flamurit nuk ishte vetëm një ceremoni; ishte një ndarje e qartë dhe e pakthyeshme me të shkuarën. Sot festojmë me dinjitet, sepse Shqipëria nuk është më vendi i fillimshekullit XX, kur shqiptarët ishin ndër popujt më të nënvlerësuar në rajon. Pozita jonë gjeopolitike është forcuar ndjeshëm dhe kemi arsye të gëzojmë për rrugëtimin dhe vetëdijen tonë shtetformuese që është rritur bashkë me shtetin tonë.
Të dashur bashkëqytetarë, 26 Nëntori është gjithashtu ditë reflektimi e humanizmi. 6 vjet më parë, Durrësi u godit nga një tragjedi e rëndë natyrore, por forca, solidariteti dhe puna e jashtëzakonshme e njerëzve tanë bënë të mundur që plagët e asaj dite të shëroheshin më shpejt. Sot përulemi me respekt para kujtimit të viktimave të tërmetit.
Të nderuar të pranishëm, Kjo ditë na fton të shohim me besim nga e ardhmja. Kombi shqiptar po forcon vit pas viti rolin e tij si faktor paqeje, stabiliteti dhe bashkëpunimi në rajonin tonë. Vendi ynë është i përqendruar fort në objektivin strategjik të integrimit në Bashkimin Evropian. Me çeljen e grupkapitujve, Shqipëria ka hedhur hapin historik drejt familjes evropiane. Sot jemi më afër se kurrë anëtarësimit në BE, që është rruga më e sigurt dhe më e mirë për të ardhmen e vendit, për mbarë shqiptarët në rajon dhe për të gjithë rajonin tonë.
Kjo ditë na jep krenarinë se jemi në të njëjtën lartësi me popujt e tjerë të Evropës, falë përpjekjeve të pandërprera për mëvetësi e shtetformim. Shqiptarët kanë dëshmuar se nuk dorëzohen kurrë dhe se dinë gjithmonë të rreshtohen në anën e duhur të historisë. Le të na shërbejë kjo ditë si thirrje për të nxjerrë më të mirën nga vetja dhe nga e kaluara jonë.
Rroftë 26 Nëntori, kjo ditë historike e qytetit tonë!
Gëzuar të gjithëve Festën e Madhe të Shpalljes së Pavarësisë!”
November 26, 2025