Bashkia e Durrësit ka organizuar një ceremoni në përkujtim të gjithë atyre të rinjve luftëtarë e patriotë që u internuan në kampet e përqëndrimit nga nazistët gjatë luftës së dytë botërore. Në këtë ceremoni merrnin pjesë kryetarja e Bashkisë së Durrësit Emiriana Sako, prefekti Emiljan Jani, përfaqësues të organizatës së veteranëve të LANÇ, si dhe qytetarë të Durrësit. Kryebashkiakja Sako dhe pjesëmarrësit e tjerë zhvilluan homazhe dhe vendosën kurora me lule në nderim të sakrificave të gjithë atyre të rinjve që u persekutuan dhe u internuan në kampet e shfarosjes masive gjatë pushtimit nazist të vendit. Në mëngjesin e 20 nëntorit të vitit 1943 qytetarët durrsakë përjetuan një ngjarje tronditëse, bastisjen e shtëpive nga nazistët dhe marrjen me forcë të bijve të tyre. Këta të rinj durrsakë u sollën me dhunë në fushën e Shkozetit, aty ku ndodhet sot një lapidar, e më pas i hipën nëpër kamionët e ushtrisë gjermane duke i dërguar fillimisht në burgun e Tiranës e po atë ditë në kampet e shfarosjes si në Prishtinë, Mat’hauzen, Dakau etj. Kryebashkiakja Emiriana Sako pasi kreu homazhet dhe vendosi kurorë me lule në lapidarin që përkujton patriotët durrsakë, deklaroi se sakrificat e këtyre njerëzve dhe të gjithë atyre që kanë dhënë jetën për lirinë e Durrësit dhe të krejt vendit do të përkujtohen me nderim në çdo kohë. Në emër të Bashkisë fjalën e rastit e mbajti drejtori i arsimit, kulturës, rinisë, sporteve dhe komuniteteve fetare në Bashkinë e Durrësit, Adrian Gurra, i cili u shpreh se: “Në pllakat memorative në varrezat e dëshmorëve të qytetit janë shumë emra të rinjsh që u vranë në kampet e Dakau, Mat’hauzenit etj. Ata të rinj durrsakë me sakrificën e tyre dhanë një mesazh të rëndësishëm, atë të luftës për liri duke sakrifikuar edhe jetën pasi atdheu është më i shtrenjti. Sakrificat e këtyre të rinjve mbeten një mesazh i fuqishëm për të gjithë brezat që e duan Shqipërinë. Kjo është një ditë historike, një nga momentet kur secili prej nesh qytetarë, të rinj, të moshuar, të gjithë brezat reflektojnë mbi të shkuarën dhe të ardhmen mbi përpjekjet dhe sakrificat njerëzore deri në humbjen e jetës në emër të një kauze të madhe, në emër të lirisë së Atdheut. Mirënjohje dhe respekt për të gjithë ata të rinj që bënë rezistencë antifashiste dhe vuajtën në burgjet dhe kampet e përqëndrimit nazist. ” Në këtë ceremoni e kanë marrë fjalën edhe përfaqësues të organizatës së veteranëve të LANÇ të cilën diskutuan për luftën antifashiste nacionalçlirimtare si dhe ngjarjet e asaj dite kur të rinjtë patriotë të Durrësit u internuan drejt kampeve të përqëndrimit.
November 20, 2024